إجتماع جوه الزريبة
قاصر على الساده الخرفان
بيقولوا في انقلابات عجيبة
قاموا بيها بني الإنسان
لغوا العلف ورموا الزكيبة
والبرسيم حطوه ف سلوفان
وهيعملوا لنا قال تركيبة
مطابقه لحقوق الحيوان
خروف كبير منهم متنور
وقف وقال أنا عندي حل
مفيش غير أن أحنا نفجّر
الزريبة آدي ع الأقل
واحد قال سمعاً وطاعة
دانتا كبيرنا يازعيم
أنت أمير الجماعة
لازم يعرف كده كل بهيم
الزعيم قال بس هص
أنا عندي خطة جهنمية
إحنا محتاجين نرص
كل من له ديل ولية
وهعمل لكوا قوانين تنص
إن إحنا بتوع الشرعية
من النهارده راح نجند
الحمير ويا الجمايس
ضد الإنقلاب وننشد
ونقول شعارات ف الهجايص
هاصدر أمر لكل زريبة
ترفع راية العصيان
ومن كل واحدة تخرج كتيبة
مسلحة ..تهز الأركان
عايزكوا تحتلوا الميادين
وتعملوا شبورة رعب
وتقولوا إحنا بتوع الدين
جايين نهديكم ياشعب
استجيبوا ولينا توبوا
واطلبوا الغفران وأوبوا
الحكاية معادتش لعب
أرجوكوا
وإلّا هنخرب بيت أبوكو
وبيت أمّوكواياولاد الكلب
ليست هناك تعليقات:
إرسال تعليق