انتفاضة يناير 77

إنتاضة يناير 77

ليه بس يابني

الحريق والخساره

وليه المظاهره

فاكرها شطاره

بدل ما تولع

في الكباريهات

روّق دمك

وولع  سيجاره

وعيب الكلام ده

عشان ما احنا يعني

قلنا بهزار

غلاء ف المعيشه

ونعملها نار

وبدال الجوامع

شقق للدعاره

وبدال المصانع

صالات للقمار

تقوم تفتكرنا

هنعمل صحيح

بهذا الكلام

اللي قاله الحمار

________

وافرض عملنا

بهذا الكلام

وغلّينا يعني

حبوب الزكام

ماتخرجشي برّه

ونصيحه عشانك

ما تشربشي خمره

بلاش يعني إنك

تبعزق فلوسك

وحوّش وكوّش

بدال المناوره

______

وافرض هانعمل

غلاء ف المعيشه

ما

مابرضك هاتضرب

حتة حشيشه

وتسكر وتنسى

فطارك  غداك

وشيئاً فشيئاً

هاتصبح ملاك

وأصل احنا أصلاً

بنعمل عشانك

وإذا عُذت يعني

تكسب زمانك

ففتّح مواهبك

دا عصر انفتاح

وكل  شئ

النهارده مباح

وكل اللي جاي

مش زي اللي راح

وإذا كان علينا

إطمن يا سيدي

بشوقك وحبك

وعندك براح

_______

وإذا الجو ضاق

بفعل المنافسه

وفعل الخناق

وضاقت ف وشّك

فاقوم لم عفشك

وسافر بسرعه

قوامك قوام

بلاد مفتوحالك

تمام التمام

إذا رحت لندن

في غمضة عين

راح ترجع بـ داتسون

وعندك فرنسا

بلاد الهلومه

هاترقص جيرك

وتاكل شاورمه

وإذا رجعت برضك

هاترجع بـ حُرمه

_______

وأمّا أمريكا

بوّاب ودكّه

في أتخن عماره

وحبه بحبه

شوية شطاره

هتصبح ياصاحبي

صاحب العماره

وتفتح محلات

عصابه ودقيق

ومافيا وعافيه

بحق وحقيق

هناك المجال

مفتوح للجميع

والجو أيضاً

مُبهج .. بديع

_____

ف ليه بس يابني

الحريق والمظاهره

وتقطع عليا المواصلات

في شبرا

ديه كانت نصيحتي

وشكرا

(حكاية شعب)

الحكاية مش حكاية مرسي
ولا حكاية رئيس وكرسي
الحكاية حكاية شعب قام
على الخرفان وثار
عالعصابة اللي كان حكمها
على مصر عار
تسمعوا الحكاية
   ** بس قولها م البداية
هي حكاية شعب جسور
رفض الذل وكسر السور
فاكرين لمّا الخرفان حكموا
وجمعوا كلابهم
  ** آه فاكرين
وللمستعمر ركعوا وخلعوا
كل ثيابهم
** مش ناسيين

ولمّا أحرارنا اللي ماتوا

ف الميدان

ساعة ما دخلوا عليهم بالشوم

والجِمال

موقعة تشهد على جرايمهم

الأندال

رجعت لنا مصر الحبيبة
الطيبة لأدين صحابها
صِعِبْ عليهم يستسلموا
ما عرفوا يوم قيمة ترابها
**  عملوا أيه
راحوا ع الغرب وامريكا
واعلنوا قرار التحدي
**  قلنا أيه
قلنا دي مصر اللي مات فدا ترابها
خالي وجدي
مش هيكسر ضهرها إرهابي
مين ف الدنيا قدي
ديه مصر شعب وجيش وشرطة 
ف اتحاد
ديه مصر أقدم حضارة تشهد
لها كل البلاد
لا الإرهاب في يوم كسرها 
ولا مستبد عليها ساد

ضربة كانت من معلم

خلّى الإرهاب يسلّم

جاب لنا داعش والفواحش

ودَبح علشان نسلّم

هو مين ..

دا احنا برضو

دول السلاحف اللي انقرضوا

الشعب في يونية خرج عليهم

بركان بشري ملوش مثيل

قبض عليهم وسجنهم

واللي هربوا عدد قليل

وده جزاء اللي مصانوش الأمانة

في دمهم الغدر دايماً والخيانة

*** هيه دي كل الحكاية

حكاية شعب قام
على الخرفان وثار
عالعصابة اللي كان حكمها
على مصر عار

عصابة أخطر م النازية

عصابة أخطر م التتار

ـــــــــــــــــــ
عادل دعبس

(أمي ياامي)

أمي ياامي

يانبع  الحنان

ياشايلة همي

على طول الزمان

يابلسم ألمي

يااعز إنسان

مهما قلت كلام

مش ممكن أعبّر

ياللي كنت بنام

وعيونِك تسهر

عليكي ألف سلام

مليون وأكتر

صورتِك في عنية

وصوتِك ف وداني

لو انساه ثانية

يعاتبني حناني

ياكل الدنيا

ايه بعدِك تاني

تمرق الأيام

وانتي مفرقاني

وتيجي ف الأحلام

تيجي علشاني

أصحى من المنام

على بُكى وجداني

أمسك الصورة

ألاقيكي معايا

يااجمل صورة

محفورة جوايا

قانعة وصبورة

وطول عمرك آيه

ياحنان وطيبة

ومثال الإخلاص

يااعز حبيبة

تنشال على الراس

خلصت الطيبة

بعدِك والإخلاص

أدفى حضن

ياشجرة ومورقة

في كل أوضة وركن

عمري ما شفت أمان

ولا أدفى منك حضن

ياشجرة ومورقة

وفارشة علينا الضل

وخدانا في حضنها

ساعة ما نيجي نهل

زي الندى والربيع

والقمرة والبستان

أيام ما كنت رضيع

شربت منها الحنان

وكبرت مهما كبرت

كانت تشيل همي

سواء ولد أو بنت

هي  دي  أمي

تتغير الأيام

والإبن يصبح أب

في الجنّه

يا امي
بادعي وباقول يارب

كل شئ له آخر

جماعة مارقة وخارجة

عن كل عرف ودين

حكمت سنة جابت

 راس البلد في الطين

إشحال

لو  استمر الحال

ومكانش قام زلزال

وخرجت الملايين

ما كنّا عرفنا نخلعهم

ولا حتى بالسكاكين

والأكاده

فُجرهم بزياده

والامريكان كالعاده

بيشجعوا الشياطين

لكن بقى م الآخر

كل شئ له آخر

والشعب مش متاخر
دا شعب يوم تلاتين