فتّحت عيني
بصّيت كده شمال يمين
الدنيا ليل
والليل يطول عالغلبانين
الليل سكات
الليل طريق الذكريات
الليل حاجات
ولكل حاجه ألف معنى
وأنا قلبي وسط الليل نجوم
والضلمه لعنه
في ناس تحب الليل
وناس
ما تحب غير بس الصباح
لمّا تشوف الفجر لاح
تعرف بإن الحق دايماً منتصر
وأنا دمعي ليل
وبسمتي وش الصباح
وأنا قلبي فدّان شوق
قلبي مفتوح عالبراح
بيعانق الكون الوسيع
عاشق مطيع
وف إيدي ماسك منجله
ماشي في أرض الناس ربيع
قدمي تدق الأرض دق
عاشق أنا وف القلب عشق
عاشق أنا
وحبيبتي أجمل ما تكون
وحنيّنه
ماليه قلوب النلس أمانة
ملياه غنا
وحبيبتي أجمل ما تكون
مين شاف رموشها والعيون
مين حس دقة قلبها
مين حبّها
في زحمة الخوف والضباب
مين كان صحيح
صامد وجامد
وبابها كسراه ألف ريح
مين صاحب القلب الجريح
مين كان في عشقه
يديها وقت الخوف أمل
ويشيل همومها
هموم ياناس ما تحتمل
وحبيبتي في الليل الطويل
بتقول غناوي للبنادق
يتقول بحب وقلب واثق
قلب عاشق
لحظه بتساوي الزمن
لسّه الطريق فيه الرمال
والعفر فيه
برضك رياح
وسيوف عشان تعرف تشوف
وكمان رماح
الفجر طالل من هنا
من دمّنا
ومصر عشان ما بتحب الربيع
بتمد ايدها للجميع
ليست هناك تعليقات:
إرسال تعليق