(مهرجان التزوير)

(المخلوع مبارك يدعو الشعب للتصويت في إنتخابات 2010)

ــــــــــــــــ

سيادته بيدعو سيادتك عشان

تحضر حفلة تزوير جنان

ودعوة سيادته واجب علينا

واجب مقدس يُلبّى ف ثوان

وهات معاك الفاميليا بتاعتك

وهات معاك فاميليا الجيران

هناك  هتشوف اللي عمرك ما شوفته

وتفضل ذكرى لآخر الزمان

حاجات لو شافوها الأهالي في لندن

ولّا ف امريكا ولّا اليابان

هيندهشوا جداً هيندهشوا خالص

خصوصاً لمّا يخشوا اللجان

هيلقواالشرطه بتدلي بصوتها

وتدلي بأيدها بكل امتنان

وغير مسموح الدخول للمراقبة

وغير مسموح الاقتراب م المكان

تقول المراقبه وفين المراقبة

هتلقى ساعتها صنوف الهوان

وبعد سيادتك ما تدلي بصوتك

انسى صوتك كأنه ما كان

فمثلاً صوتك في صندوق لجنة خمسة

هتلقاه في صندوق لجنه عشره كمان

وصوتك اللي اديته لأيمن

هيقلش كأنه سحابة دخان

وفجأه هتلقاه راح للحسيني

مين الحسيني ؟ بتاع اللومان

بنشكر سيادتك وعظمة سيادتك

وكل اللي شاركوا ف المهرجان